ललितपुर– महालक्ष्मी नगरपालिकामा आइतबारदेखि चौथो राष्ट्रपति रनिङ शिल्ड प्रतियोगिता सुरु हुँदैछ ।

महालक्ष्मी नगरपालिका, ललितपुरको आयोजनामा हुने राष्ट्रपति रनिङ शिल्डको तयारी पूरा भएको निमित्त प्रमुख प्रशासकीय अधिकृतसमेत रहेका शिक्षा शाखा प्रमुख चिरञ्जीवी पौडेलले जानकारी दिए । नगरपालिकाको वडा नम्बर ६ स्थित डनबस्को स्कूलमा उदघाटन समारोह हुनेछ ।

बागमती प्रदेशका पूर्वस्वास्थ्यमन्त्री एवं प्रदेश सभा सदस्य रामेश्वर श्रेष्ठले उदघाटन गर्ने प्रतियोगिता तीन दिनसम्म चल्नेछ । शिक्षा शाखा प्रमुख पौडेलका अनुसार राष्ट्रपति रनिङ शिल्डमा यसपटकदेखि ओलम्पिक टर्च बालेर कार्यक्रम सुरु हुनेछ । उदघाटन कार्यक्रममा विद्यार्थीहरुको मार्च पास, झाँकी, नृत्य लगायतका कार्यक्रम रहनेछ ।

उदघाटन कार्यक्रममा नगर प्रमुख हरिगोविन्द श्रेष्ठ, उपप्रमुख लक्ष्मी महर्जनलगायतले सम्बोधन गर्ने कार्यक्रम तय भएको छ ।

प्रतियोगितामा भलिबल, कबड्डी, एथलेटिक्स (दौड, हाइजम्प, लङजम्प, त्रिपलजम्प, ज्याभलिङ थ्रो, सटफुट), मार्सल आर्ट (कराँते, तेक्वान्दो, उसु) मा छात्र र छात्रातर्फका खेलमा एक हजार जना खेलाडी विद्यार्थी सहभागी हुने पौडेलले जानकारी दिए । प्रतियोगितामा नगरभरीका ३७ विद्यालय प्रतिस्पर्धा गर्नेछन् ।

आइतबारदेखि सुरु हुने चौथो राष्ट्रपति रनिङ शिल्ड प्रतियोगितालाई उत्सवकारुपमा मनाउन नगर प्रमुख हरिगोविन्द श्रेष्ठले अपिल गरेका छन् । चौथो राष्ट्रपति रनिङ शिल्ड प्रतियोगिता २०८० व्यवस्थापन तथा निर्देशन समितिको बैठकलाई शनिबार सम्बोधन गर्दै उनले प्रतियोगितालाई नगरको खेल उत्सवकोरुपमा लिएर सहभागी हुन नगरबासीलाई अपिल गरेका छन् ।

नगर प्रमुख श्रेष्ठले विगतबाट पाठ सिक्दै २०८० सालको राष्ट्रपति रनिङ शिल्ड प्रतियोगिता परिस्कृत र सफल हुने विश्वास व्यक्त गरे ।

उपप्रमुख लक्ष्मी महर्जनले खेल संस्कृतिको विकासका लागि नगरपालिकाले आगामी दिनमा खेलकुदलाई विशेष प्राथमिकता दिने जानकारी दिइन् ।

प्रमुख प्रशासकीय अधिकृत प्रदीप पौडेल, नगर शिक्षा समितिका संयोजक बाबुराजा महर्जन, जिल्ला खेलकुद विकास समिति अध्यक्ष विनोद महर्जनलगायतले प्रतियोगितालाई आगामी वर्षमा अझै व्यवस्थित बनाउन समीक्षा गर्दै जानुपर्ने बताए ।

यसैबीच राष्ट्रपति रनिङ शिल्ड प्रतियोगिताबारे जानकारी दिन आइतबार बिहान प्रभातफेरी कार्यक्रम आयोजना गरिएको छ । इमाडोलस्थित अशोक स्तुपाबाट सुरु हुने प्रभातफेरी महालक्ष्मी मन्दिर लुभुसम्म पुग्ने कार्यक्रम छ ।