अन्तर्राष्ट्रिय विज्ञान परिषद्को सय जना फेलोहरूमा नेपालबाट वातावरणीय स्वास्थ्य वैज्ञानिक डाक्टर मेघनाथ धिमाल मनोनीत भएका छन् । इन्टरनेशनल साइन्स काउन्सिल(आईएससी)ले मंगलबार संसारभरबाट सय जना वैज्ञानिकलाई छनोट गर्दा नेपालबाट डाक्टर धिमाल मनोनीत भएका हुन् । साइन्स काउन्सिलले विज्ञानलाई विश्वव्यापी सार्वजनिक हितको रुपमा प्रवर्द्धन गर्न उत्कृष्ट योगदान गरेको आधारमा डाक्टर धिमालसहितका वैज्ञानिकहरूलाई फेलोको रुपमा छनोट गरेको हो ।

आईएससी फेलो विज्ञान परिषद्को सर्वोच्च पद हो । छनोट भएका फेलोहरुमा विभिन्न क्षेत्रमा उत्कृष्ट योगदान गर्ने व्यक्तिहरू रहेका छन् । जसमा सामाजिक र प्राकृतिक वैज्ञानिकहरू, इन्जिनियरहरूलगायत विज्ञानमार्फत समाजमा महत्वपूर्ण योगदान गरेका छन् ।

दिगो विकासको लक्ष्य हासिल गर्न विश्व धेरै खालको खतराबाट गुज्रिरहेको सन्दर्भमा यी वैज्ञानिकहरूले लक्ष्य प्राप्तिका लागि योगदान गर्ने आईएससीद्वारा जारी विज्ञप्तिमा उल्लेख छ ।

नेपाल स्वास्थ्य अनुसन्धान परिषद्मा प्रमुख अनुसन्धान अधिकृतका रूपमा कार्यरत वैज्ञानिक धिमाल नेपालका सबैभन्दा बढी साइटेसन भएका वैज्ञानिकहरूमा पर्छन् । उनी र उनी सामेल भएका वैज्ञानिक आलेखहरूले धेरै नै साइटेसन पाएका छन् ।

नेपालमा अध्यायपन गराउने विश्वविद्यालयका प्राध्यापकहरूकोभन्दा बढी गुगल स्कोलर साइटेसन अनुसन्धानकर्ता धिमालको छ । उनका साइटेसन ४० हजार नाघेको छ ।

वातावरण स्वास्थ्यमा काम गरिरहेका धिमालको प्राथमिक क्षेत्र जलवायु परिवर्तन र वातावरणीय स्वास्थ्यमा रहेको छ । नेपाल विज्ञान तथा प्रविधि प्रज्ञा प्रतिष्ठान (नास्ट)का सह-प्राज्ञ समेत रहेका धिमाल त्रिभुवन विश्वविद्यालयको वातावरणीय स्वास्थ्यको भिजिटिङ फ्याकल्टीमा कार्यरत छन् । उनले नेपालमा वातावरणीय र जलवायु परिवर्तन, नसर्ने रोग, उपेक्षित उष्णकिट रोग, स्वास्थ्य प्रणालीलगायतका धेरै अनुसन्धान परियोजनाहरूको नेतृत्व गरिसकेका छन् ।

जलवायु परिवर्तन र स्वास्थ्यको क्षेत्रमा महत्वपूर्ण योगदानको कदर गरेको भन्दा नास्टले उनलाई सन् २०१५ को उत्कृष्ट युवा वैज्ञानिक सम्मानबाट पुरस्कृत गरेको थियो । तीनसयभन्दा बढी प्राज्ञिक लेख तथा टेक्निकल रिपोर्टहरू तयार गरेका धिमालले सन् २०१५ मा जर्मनीको गोएथे विश्वविद्यालयबाट भू-विज्ञान (पर्यावरणीय स्वास्थ्य विज्ञान) मा पीएचडी पूरा गरेका थिए ।