काठमाडौं, – काठमाडौँ उपत्यकाको तापक्रम दुई दिन यता औसतभन्दा तल झर्दै गएको मौसमविद्ले जनाएका छन् । जसका कारण आज बिहान हिउँद अवधिकै अहिलेसम्मकै बढी जाडो महसुस भएको छ ।

आजको औसत तापक्रम ३ डिग्री सेल्सियस रहेकोमा अहिले ८:४५ मा २ दशमलव १ डिग्री सेल्सियस मापन भएको मौसमविद् सञ्जीव अधिकारीले जानकारी दिए।

यसअघि आज बिहान ५:४५ बजे काठमाडौँ उपत्यकामा न्यूनतम तापक्रम २.२ डिग्री सेल्सियस मापन गरिएको थियो।

‘दुई दिन अगाडिसम्म औसत र त्यसकै हाराहारीमा रहेको उपत्यकाको तापक्रम हिजो र आज औसतभन्दा तल झर्दै गएको छ,’ अधिकारीले भने, ‘बिहान आकाश खुल्ला हुँदा तापक्रम केही घट्नु स्वाभाविक हो।’