नेपालका वातावरणीय स्वास्थ्य वैज्ञानिक डाक्टर मेघनाथ धिमाल विश्व स्वास्थ्य संगठनको प्राविधिक सल्लाहकार समूहमा नियुक्त भएका छन् । डब्लूएचओको नसर्ने संक्रामक रोगहरूको रोकथाम र नियन्त्रणमा रणनीतिक र प्राविधिक सल्लाहकार समूह(STAG-NCD)को विज्ञ सदस्यमा नियुक्त भएका हुन् ।

डब्लूएचओको यो सल्लाहकार समूहले विश्वव्यापी रूपमा नसर्ने संक्रामक रोगहरूको नियन्त्रण र रोकथाममा सहयोग पुर्‍याउने उद्देश्यले सन् २०२१ अक्टोबरमा स्थापना गरिएको थियो ।

डा. धिमालसँग वातावरणीय स्वास्थ्य,जलवायु परिवर्तनको अनुसन्धान क्षेत्रमा २० वर्षभन्दा बढीको अनुभव छ । हाल उनी नेपाल स्वास्थ्य अनुसन्धान परिषद्का मुख्य अनुसन्धान अधिकृतको रूपमा कार्यरत छन् । उनी नेपाल विज्ञान तथा प्रविधि प्राज्ञ प्रतिष्ठान (नास्ट)का सह-प्राज्ञ समेत हुन् । अनुसन्धानकर्ता धिमाल येल विश्वविद्यालयको भिजिटिङ फ्याकल्टीको रूपमा समेत कार्यरत छन् ।

दर्जनभन्दा बढी वैज्ञानिक अवार्ड र पुरस्कार पाएका वैज्ञानिक धिमाल अन्तर्राष्ट्रिय विज्ञान परिषदको सदस्यको रूपमा नेपालबाट चयन हुने पहिलो फेलो पनि हुन् ।

STAG-NCD को सदस्यको रूपमा उनी नसर्ने संक्रामक रोगहरूको रोकथाम र नियन्त्रणमा हालका र भावी चुनौतीहरू पहिचान गर्ने, डब्लूएचओलाई आवश्यक पर्ने रणनीतिक योजनाहरू निर्माण, वैश्विक रणनीतिक दस्तावेज निर्माणमा सल्लाह दिने र अन्य रणनीतिक प्रस्ताव निर्माण तथा कार्यहरूमा संलग्‍न हुने छन् ।

उनको यस नियुक्तिले नेपाललाई अन्तर्राष्ट्रिय मञ्चमा थप पहिचान दिलाउने र स्वास्थ्य क्षेत्रमा महत्वपूर्ण योगदान पुर्‍याउने अपेक्षा गरिएको छ।