काठमाडौँ, – सांसद रेखा यादवले आगामी आर्थिक वर्षका लागि विनियोजन भएको बजेटको कार्यान्वयन पक्ष फितलो बनाउन नहुनेमा जोड दिएका छन् ।

आव २०८१/८२ को राजस्व र व्ययको वार्षिक अनुमानमाथि छलफल गर्न आज बसेको प्रतिनिधिसभा बैठकमा सांसद यादवले बजेटको कार्यान्वयन प्रभावकारी हुनुपर्नेमा जोड दिएका छन् । “जेठ १५ गते अर्थमन्त्रीले नेपालमा उत्पादित अल्लोको झोलामा बोकेर बजेट ल्याउँदा सकारात्मक देखिए पनि झोलाभित्रको वक्तव्यले उत्साह दिन सकेन”, उनले भने, “समाजवाद अर्थतन्त्र उन्मुख बजेट प्रभावकारी कार्यान्वयन गर्नु चुनौतीपूर्ण छ ।”

सांसद यादवले बजेटमा कृषि दशक घोषणा भए पनि कृषि मन्त्रालयका लागि विनियोजन भएको बजेटको आकार घटाइएको भन्दै उत्पादनशील क्षेत्रलाई राज्यले उपेक्षित गरेकामा आपत्ति जनाए । चुरेमा पानीको हाहाकार मच्चिएर जनता समस्यामा परेका भन्दै चुरे संरक्षणका लागि राज्यले प्रभावकारी कार्यक्रम ल्याउन नसकेको बताए ।

“चुरेमा खानेपानी तथा सिँचाइका लागि पानीको अभाव छ । चुरेका बासिन्दा समस्या समाधानका लागि काठमाडौँमा आएर अनशन बसेका छन्”, सांसद यादवले भने,“चुरेको ढुङ्गागिटी उत्खनन गर्न खनिजजन्य नीति ल्याएपछि दोहन भएको हो । चुरे दोहन रोक्ने नीति बजेटको प्राथमिकतामा पर्नुपर्छ ।”

उनले भएका पुराना उद्योग सञ्चालन गर्न सरकारले सहज वातावरण निर्माण गरिदिनुपर्नेमा जोड दिए । “पुराना उद्योग सञ्चालन गर्न वातावरण नदिने अनि नयाँ उद्योग खोल्न लगानी आह्वान गरेर मात्र हुन्छ ?”, उनले संसद्मा प्रश्न गरे ।