काठमाडौं, – लुम्बिनी प्रदेशका नवनियुक्त मुख्यमन्त्री चेतनारायण आचार्यले आज पद तथा गोपनियताको शपथग्रहण गर्न लागेका छन्।

प्रदेश प्रमुख कार्यालयका प्रवक्ता धर्मा अर्याल बेलबासेका अनुसार अहिले बिहान ८.३० बजे उनको शपथ तथा पदभार ग्रहण कार्यक्रम तय गरिएको छ।

बुटवलस्थित प्रदेश प्रमुखको कार्यालयमा शपथग्रहण हुने भएको हो। कांग्रेस र एमालेका ५६ सांसदको समर्थनमा एमाले संसदीय दलका उपनेता आचार्यलाई सोमबार मुख्यमन्त्री नियुक्त गरिएको हो।

प्रदेश प्रमुख अमिक शेरचनले अर्घाखाँची क्षेत्र नं. १ (१) बाट निर्वाचित आचार्यलाई मुख्यमन्त्री नियुक्त गरेका हुन्। संसद्मा एमालेका २९ र कांग्रेसका २७ सांसद छन्।