काठमाडौं- प्रधानमन्त्री सुशीला कार्कीले आगामी निर्वाचनलाई अधिक स्वच्छ, मर्यादित खर्चयुक्त र मतदातामैत्री बनाउन सबै राजनीतिक दललाई आग्रह गरेकी छन्।

नेपाल परिवार दलको प्रतिनिधिमण्डलसँग प्रधानमन्त्री तथा मन्त्रिपरिषद् कार्यालयमा शुक्रबार भएको भेटवार्तामा उनले अनावश्यक खर्च, तडकभडक प्रचार तथा मतदातालाई अनुचित रूपमा प्रभावित पार्ने प्रवृत्ति रोक्नुपर्नेमा जोड दिइन्। उनका अनुसार चुनावी प्रचारप्रसारको शैली नै परिवर्तन गरी न्यून खर्चमा निष्पक्ष प्रतिस्पर्धा गर्न सके मात्रै संसदमा योग्य र असल प्रतिनिधिहरू पठाउन सकिने छ।

प्रधानमन्त्री कार्कीले भनिन्, “चुनाव विगतभन्दा फरक हुनुपर्छ। तडकभडक नगरी, उमेदवारले पैसा खर्च गर्नुपर्ने अवस्था हटाएर प्रचारको नयाँ शैली विकास गर्नुपर्छ। तब मात्र सदनमा असल मान्छे पुग्छन्।”

भेटमा परिवार दलका अध्यक्ष एकनाथ ढकालले वर्तमान सरकार बनेको बेलादेखि नै आफ्ना तर्फबाट स्वागत गरिएको बताउँदै सरकारका कदमहरूलाई गुणदोषका आधारमा समर्थन वा आलोचना गर्ने नीति अपनाइने जानकारी दिए। उनले भने, “सबै दल अहिले निर्वाचनको तयारीमा लाग्नुपर्छ। प्रमुख दलका नेताहरूसँग समेत निरन्तर संवाद गर्दै निर्वाचनको वातावरण मजवुत बनाउनुपर्छ भन्ने हाम्रो सुझाव छ।”

ढकालले पार्टीले निर्वाचनको तयारीस्वरूप दल दर्ता गरिसकेको उल्लेख गर्दै आसन्न निर्वाचनको वातावरण निर्माणका लागि प्रधानमन्त्रीले गर्दै आएको पहल प्रशंसनीय रहेको बताए।