काठमाडौँ,। रसुवागढी नाका प्रयोग गरेर एक वर्षमा साढे १३ हजार धार्मिक पर्यटक चीनको स्वशासित क्षेत्र तिब्बतस्थित कैलाश मानसरोवर भ्रमणमा पुगेका छन् ।अध्यागमन कार्यालय, रसुवागढीको आर्थिक वर्ष २०८२/८३ को तथ्यांकअनुसार एक वर्षमा १३ हजार ५ सय २३ पर्यटक कैलाश मानसरोवर गएका छन् ।

यो अघिल्लो आर्थिक वर्षको तुलनामा १८.७५ प्रतिशतले बढी हो । आ.व. २०८१र८२ मा ११ हजार ३ सय ८७ पर्यटक कैलाश मानसरोवर गएका थिए । हिन्दु, बौद्ध, जैन, बोन धर्म मान्नेका लागि कैलाश मानसरोवर महत्वपूर्ण तीर्थस्थल हो । हुम्लाको हिल्सा नाका हुँदै जान खर्चिलो भएकाले रसुवागढी नाकाको प्रयोग बढ्दो छ ।

ल्हेन्दे खोलामा आएको बाढीले नेपाल र चीन जोड्ने मितेरी पुल २०८३ असार २४ मा बगाएको थियो । चीनले बेलिब्रिज बनाएपछि पुसदेखि अध्यागमनले काम थालेको थियो । त्यसयता गत आर्थिक वर्षमा ७ महिनामात्र नाका सञ्चालनमा आएकोमा अघिल्लो आर्थिक वर्षभन्दा आवागमनमा वृद्धि भएको अध्यागमन कार्यालय, रसुवागढी प्रमुख यादव भण्डारीले बताए ।

एक वर्षमा ५३ हजार ७ सय ४२ जनाले चीन–नेपाल आउजाउ गर्न रसुवागढी नाका प्रयोग गरेका छन् । आर्थिक वर्ष २०८२/८३ मा २७ हजार २ सय ९३ पर्यटक नेपाल भित्रिएको र नेपालबाट २६ हजार ४ सय ४९ पर्यटक बाहिरिएको प्रमुख भण्डारीले बताए ।

पछिल्लो दुई वर्षको तुलना गर्दा यो नाकाको प्रयोग २०.७४ प्रतिशतले वृद्धि भएको छ । आर्थिक वर्ष २०८१/८२ मा ४४ हजार ५ सय ९ जना पर्यटकले यो नाका प्रयोग गरेका थिए ।

कैलाश मानसरोवर भ्रमणकै कारण नेपाल र चीन जोड्ने यो नाका प्रयोग गर्नेमा भारतीयको संख्या धेरै छ । आर्थिक वर्ष २०८२/८३ मा २४ हजार २ सय ७८ भारतीय, १० हजार २ सय ५७ नेपाली, ६ हजार २७ चिनियाँ, ४ हजार २ सय १४ अमेरिकी, १ हजार ५ सय ३४ अष्ट्रेलियाली, ९ सय १७ रसियन, ९ सय ११ मलेसियन, ८ सय ८४ भुटानी, ८ सय १० बेलायती र ४ सय २० क्यानेडिन सीमा वारपार गरेको तथ्यांक छ ।

कैलाश मानसरोवरबाहेक पर्यटक यो नाका प्रयोग गरेर ल्हासा, एभरेष्ट बेस क्याम्प आधार शिविरको चिनियाँ क्षेत्र जान्छन् । गत आर्थिक वर्षमा यो नाका प्रयोग गरेर ल्हासा र आधार शिविर जानेको संख्या घटेको छ । गत वर्ष ६ सय २६ जना ल्हासा र २२ जना आधार शिविर गएको तथ्यांक छ ।

ल्हासा जानेको संख्या अघिल्लो आर्थिक वर्षको तुलनामा ६७.२० प्रतिशतले र आधार शिविर जानेको संख्या ९२ प्रतिशतले घटेको छ । आ.व. २०८१/८२ मा १ हजार ९ सय ९ जना ल्हासा र २ सय ७६ जना आधार शिविर गएका थिए ।