काठमाडौं– नेपाल औषधि व्यवसायी संघका अध्यक्ष मृगेन्द्रमेहर श्रेष्ठले ९ वर्षपछि संघको नेतृत्व हस्तान्तरण गर्दैछन् । उनले असोज ८ गते नवनिर्वाचित अध्यक्ष प्रकाशकुमार खण्डेलवाललाई नेतृत्व हस्तान्तरण गर्दैछन् ।
९ वर्ष सफल नेतृत्व दिएर श्रेष्ठले आफ्नो जिम्मेवारी निवर्तमान कार्यसमितिका वरिष्ठ उपाध्यक्ष खण्डेलवाललाई हस्तान्तरण गर्नेछन् । श्रेष्ठको पहिलो कार्यकालमा खण्डेलवाल आयाततर्फको उपाध्यक्ष र दोस्रो कार्यकालमा वरिष्ठ उपाध्यक्ष थिए ।
वीरगन्जमा भदौ २२ र २३ गते भएको राष्ट्रिय महाधिवेशनमा श्रेष्ठले आफ्नो पक्षधरता खुलाएनन् । निवर्तमान अध्यक्षकारुपमा उनले तटस्थ भूमिका निर्वाह गरेर बिदा भएका छन् ।
तीन दशकदेखि औषधि व्यवसायी संघमा निरन्तर नेतृत्वमा रहेका श्रेष्ठले संघको सर्वोच्च पदमा दुई कार्यकाल बिताएका छन् । संघको विधान अनुसार एक कार्यकाल तीन वर्षको रहन्छ । तर, उनले भूकम्प, नाकाबन्दी र कोभिड महामारीका कारण थप तीन वर्ष नेतृत्व लिए । ‘समयमा नै निर्वाचन गरेर म नेतृत्व हस्तान्तरण गर्ने योजनामा थिएँ,’ उनी भन्छन्, ‘परिस्थितिले कार्यकाल लम्ब्याउनुपर्ने अवस्था रह्यो ।’
![](https://kathmanduexpress.com/wp-content/uploads/2023/09/Mrigendra-1-768x512.jpeg)
वीरगन्जमा भदौ २२ भएको राष्ट्रिय अधिवेशन उदघाटन कार्यक्रममा पनि श्रेष्ठले आफ्नो कार्यकालको समीक्षा गर्दै मूल्यांकन गर्ने जिम्मा आफ्ना देशभरका सदस्यलाई दिएका छन् ।
‘संघमा मेरो दोस्रो कार्यकाल पूरा हुँदै गर्दा म तीन वटा क्षणहरु सम्झन चाहन्छु । पहिलो कार्यकालमा मेरो नेतृत्वमा औषधि व्यवसायीहरुले महाभूकम्प र नाकाबन्दीको सामना गरेका थियौं भने दोस्रो कार्यकालको अधिकांश समय कोभिड महामारीविरुद्ध लड्नुपर्ने बाध्यात्मक परिस्थिति आयो,’ उनले उपराष्ट्रपतिको उपस्थितिमा भएको कार्यक्रममा वीरगन्जमा भनेका थिए, ‘महाभूकम्प, नाकाबन्दी र कोभिडविरुद्धको लडाइँमा साथ दिनुभएकोमा सबै व्यवसायीहरुलाई सम्झन चाहन्छु । कठीन परिस्थितिमा कालोबजारी हुनबाट व्यवसायलाई जोगाएर व्यवसायिक शीर उचो बनाउन सहयोग गर्नुभएकोमा आज देशभर रहनुभएका ३२ हजार व्यवसायी बधाईका पात्र हुनुभएको छ ।’ वार्षिक ६५ अर्ब कारोबार भइरहेको औषधि व्यवसायमा अहिले हजारौंले रोजगारी पाएका छन् ।
आफ्नो नेतृत्वमा भएका दुइटै राष्ट्रिय अधिवेशनमा उपराष्ट्रपतिलाई उभ्याएर संस्थाको उचाइ बढाउन श्रेष्ठले योगदान दिएका छन् । संघमा कुनै राष्ट्रिय अधिवेशन ज्येष्ठ सदस्यले उदघाटन गरेर पनि काम चलाइएको स्थिति थियो ।
![](https://kathmanduexpress.com/wp-content/uploads/2023/09/NCDA--768x512.jpg)
१४ औं राष्ट्रिय अधिवेशन आफ्नो व्यक्तिगत जीवनको पनि संयोगको रहेको उनको भनाइ छ । ‘२०७२ सालमा पहिलो कार्यकाल मधेस प्रदेशको सिरहाबाट मैले अध्यक्षको नेतृत्व सम्हालेको थिएँ । दोस्रो कार्यकालको पूरा पनि मधेस प्रदेशबाटै गरेको छु,’ उनी भन्छन् ।
औषधि व्यवसायीहरु श्रेष्ठलाई सफल अध्यक्षको रुपमा चित्रित गर्दछन् । उनको कार्यकालमा औषधि व्यवसायीका मुद्दाहरु वार्ताबाट समाधान भएका छन् भने व्यवसायीलाई कालोबजारीको ‘ट्याग’बाट मुक्त गराएका छन् । अर्को महत्त्वपूर्ण कुरा, श्रेष्ठले संघका लागि पूरापूर समय दिएका थिए । नेतृत्वले समय दिएकै कारण संघले राम्रो नतिजा प्राप्त गरेको व्यवसायीको बुझाइ छ ।
श्रेष्ठको नेतृत्वमा महाभूकम्प, नाकाबन्दी र कोभिड महामारीमा फ्रन्टलाइनर औषधि व्यवसायीले समाजमा सकारात्मक छाप छाडेका छन् । भूकम्प र नाकाबन्दीमा खाद्य तथा इन्धनमा कालोबजारी हुँदा पनि औषधि व्यवसायीलाई उनले जोगाएका थिए । कोभिडमा पनि श्रेष्ठले औषधि व्यवसायीलाई सुरक्षा सावधानी सहित मैदानमा उतारेका थिए ।
‘२०७१ सालमा सिरहाको लहान र २०७६ सालमा कास्कीको पोखरामा भएको राष्ट्रिय अधिवेशनबाट अध्यक्षमा निर्वाचित भएपछि करिव ९ वर्षपछि मैले संस्थाको मूल नेतृत्व हस्तान्तरण गर्ने क्षणमा आएको छु,’ उनी भन्छन्, ‘आजको यस क्षणमा चार दशकदेखि औषधि व्यवसायमा क्रियाशील हुँदै आएको र तीन दशकदेखि औषधि व्यवसायी संघका कुनै न कुनै जिम्मेवारीमा रहेर काम गरेको स्मरण गरिरहेको छु ।’
![](https://kathmanduexpress.com/wp-content/uploads/2023/09/NCDA-A-768x582.jpg)
सामूहिकतामा विश्वास गर्ने भएकाले ९ वर्षमा आफूले गरेका सकारात्मक कार्य र सफलताहरु सिंगो टिमको रहेको श्रेष्ठको भनाइ छ ।
श्रेष्ठले आफ्नो कार्यकालमा संस्थागत सुधार, संरचनात्मक परिवर्तन र संस्थागत सुशासनको प्रयास गरेको बताउँछन् । ‘औषधि व्यवसायी संघ प्रदेश संरचनामा रुपान्तरण भएको छ भने महासंघमा लैजाने जग बसालेका छौं । आशा छ, नयाँ कार्यसमितिले महासंघमा रुपान्तरण गर्दै विभिन्न समूह र संस्था खडा गरेका व्यवसायीलाई एउटै छातामा ल्याउन सफल हुनेछ,’ उनी भन्छन् ।
औषधि व्यवसायी संघ प्रादेशित संरचनामा गएसँगै सबै प्रदेशमा प्रदेश समिति गठन गरेर अधिवेशन समेत भएका छन् भने ५४ जिल्लामा शाखा गठन भएका छन् ।
औषधि पसलको नवीकरण वार्षिकरुपमा गर्नुपर्ने व्यवस्थालाई श्रेष्ठको कार्यकालमा नै तीन–तीन वर्षमा नवीकरण गर्ने व्यवस्था कार्यान्वयन हुने क्रममा छ ।
रिफ्रेसर कोर्स सञ्चालनदेखि ओरिएन्टेसन कोर्ष तालिम उत्तीर्ण गरी प्राप्त प्रमाण–पत्रको आधारमा थोक पसल/फर्म दर्ता, औषधि व्यवसायी सहायक प्रशिक्षण तालिमलगायत श्रेष्ठको कार्यकालमा दूरगामी असर गर्ने कामले सफलता पाएका छन् ।
प्रतिक्रिया