काठमाडौँ,– सशस्त्र प्रहरी बल नेपालका इकाइमा एकै साथ आयोजना गरिएको रक्तदान कार्यक्रममा आज एकै दिन एक हजार युनिटभन्दा बढी रगत सङ्कलन भएको छ ।

आफ्नो ‘२३औँ सशस्त्र प्रहरी दिवस २०८०’ को पूर्वसन्ध्यामा आज नेपाल एपीएफ अस्पताल बलम्बुको काठमाडौँको आयोजनामा सशस्त्र प्रहरी बल नेपाल प्रधान कार्यालय तथा बाहिनी मुख्यालय र मातहत इकाइमा आयोजना गरिएको रक्तदान कार्यक्रममा कूल एक हजार ८७ जनाले रक्तदान गरेका छन् ।

प्रधान कार्यालयअन्तर्गत एक सय १५ जना, नम्बर १ बराह बाहिनी मुख्यालय सुनसरी तथा मातहतबाट एक सय २०, २ नम्बर छिन्नामस्ता बाहिनी मुख्यालय महोत्तरी तथा मातहत इकाईबाट दुई सय ४५, नम्बर ३ गढीमाईबाहिनी मुख्यालय मकवानपुर तथा मातहत इकाईहरुबाट एक सय ९८ जनाले रक्तदान गरेका सशस्त्र प्रहरीका प्रवक्ता, प्रहरी वरिष्ठ उपरीक्षक राजेन्द्र खड्काले बताए ।

त्यस्तै नम्बर ४ मुक्तिनाथ बाहिनी मुख्यालय कास्की तथा मातहत इकाइबाट ७० जना, नंम्बर ५ विन्ध्यावासिनी बाहिनी मुख्यालय रुपन्देही तथा मातहत इकाइबाट एक सय ३१ जना, नम्बर ६ महेश्वरी बाहिनी मुख्यालय सुर्खेत तथा मातहत इकाइबाट ३१, नम्बर ७ बैद्यनाथ बाहिनी मुख्यालय कैलाली तथा मातहत इकाइबाट एक सय ११ जना र नम्बर ९ पशुपतिनाथ बाहिनी मुख्यालय काठमाडौँ तथा मातहत इकाइबाट २६ जनाले रक्तदान गरेका छन् ।

स्थापना दिवसका अवसर पारेर सशस्त्र प्रहरी र मातहतका युनिटले साताव्यापी मैत्रीपूर्ण खेल तथा विभिन्न कार्यक्रम जारी छ । सशस्त्र प्रहरीले भोलि विशेष समारोहबका बीच आफ्नो २३औँ स्थापना दिवस मनाउँदै छ ।