काठमाडौँ- नेपाली कांग्रेसले पार्टीका पूर्वउपसभापति पूर्णबहादुर खड्कालाई सात दिनभित्र लिखित स्पष्टीकरण पेश गर्न आदेश दिने औपचारिक निर्णय गरेको छ।

नेपाली कांग्रेसको केन्द्रीय अनुशासन समितिको आज सम्पन्न बैठकले पार्टीको आधिकारिक लेटरप्याड प्रयोग गरी आफूमा निहित नरहेको पदीय जिम्मेवारीको अभ्यास गरेको तथा गत चैत ३० गते विधानको भावना विपरीतका गतिविधिहरू सञ्चालन गरेको ठहर गर्दै उक्त कारबाही प्रक्रिया अगाडि बढाएको जानकारी दिएको छ।

उक्त समितिले नेता खड्काले यसअघि पनि अर्थात् गत चैत १४ गतेका दिन पार्टीको आधिकारिक लेटरप्याड प्रयोग गरेर अनधिकृत रूपमा वक्तव्य सार्वजनिक गरेको भन्दै सोही विषयलाई लिएर उनलाई सचेत गराउने निर्णय समेत गरेको छ। यसैगरी, अनुशासन समितिले गत फागुन २१ गते सफलतापूर्वक सम्पन्न भएको प्रतिनिधिसभा सदस्य निर्वाचनका क्रममा पार्टीको विधानको विरुद्धमा गएर अनुशासन उल्लङ्घन गर्ने व्यक्तिहरूका विरुद्धमा उजुरी दर्ता गर्ने समयसीमामा पनि वृद्धिको घोषणा गरेको छ।

समितिको निर्णय अनुसार अब त्यस्ता अनुशासनहीन कार्यमा संलग्नहरूका विरुद्ध उजुरी दिने अवधि आगामी वैशाख मसान्तसम्मका लागि थप गरिएको व्यहोरा सार्वजनिक गरिएको छ।